撞正怒火街頭的大日子！

11月24日真是好日！除了是我的大日子之外，還是很多女生的大日子，不論出門，入門，在屋苑，在花車路上都不停遇上各對新人，至少起碼撞到三對以上！自己的十一月新娘group也有Mavis跟我在同一屋苑出門！

不過是日結婚讓我最頭痛的不是周圍都係新人，而係梁特首！！！多得佢，我的婚禮被各種火藥味之下重重包圍！何解？大家有看新聞都知道，梁特首在這個大好日子進行第一次的地區咨詢，跟市民相談施政報告的表演秀地點就在沙田官立中學，而我行禮的教堂就係正佢對面！！！自我big day前幾日到教堂綵排後就發現，當晚已有不少警察在演習，再有兄弟通知才知道11月24日的大集會！而且咨詢會跟我的婚禮時都都撞到正係二至四點，到時門外將會聚集一大群示威者。之後我真係擔心左成晚……因為教堂只知道這件事，又無通知我可以點做，打去警察又比人pass來pass去不同部門……

直至上星期四，教堂致電我說警察只比三部私家車我入教堂，我仍然很不安，因為我只book了花車同28van，婚禮完成又book了60座大巴，唔比佢地入可以停去邊？仲有封晒路我的賓客可以點去教堂？

星期五，教堂突然通知會有警方向我聯絡，最後收到一個阿sir電話，話要直接與我們見面講解當日會發生的事及警方安排，無啦啦係最多野執最多野煩的時間比呀特首搞到我更煩。但既然警察會親自解釋當然聽，他們還非常好地親自上門家訪！係婚禮增加難忘元素！即日下午一位總督察就帶了另外兩位警員(便衣look)家訪向我講解了一下他們當日如何安排我順利舉行婚禮，big day教堂亦有阿sir會在場協助交通安排。聽完一輪講解後心都定左好多，之後就繼續準備婚前要做的執拾和製作表單工作。

好啦！到了星期日，基本上因為特首，行程真係比預期還要順暢，原本要1:30先比我地入教堂，因為擔心延誤，我1:10早到了都即比我地花車即入教堂停車場，而28va雖然要在其他路上等一會，但最後都順利係教堂門口附近落車。這個時間，穿回整套警察制服的總督察突然出現在我面前跟我握手致賀，我都不知比什麼反應，只是連忙說「多謝多謝！」化妝師事後說我跟他握手一幕影唔到好唔抵，因為28van事後先落到客，攝影師都未落到車影相……

因為害怕特首兩點幾出現，喧嘩聲太大，婚禮比原定提早了十分鐘開始，也不知道是否有賓客害怕示威場面，到場觀禮的人比預期少了，但總之因為特首，我的婚禮非常快同順利完成，原本book了這間教堂還擔心不夠時間影相，現在卻因為提早開始有成粒鐘影相，攝錄師仲可以夠時間補shot！ 成個證婚過程，我只有數分鐘聽到出面少少的示威聲(教堂幫我關掉所有門都幾隔音，數分鐘的聲音可能真係特首剛到的示威喧嘩聲？)總之，神的恩典永遠夠用！

最後，又係有警察安排下賓客都順利上到60座大巴(不過最後都要行一段路) 原本我想跟去一齊坐60大巴，但比阿sir阻止，叫新人唔好離開教堂範圍走，最後改為坐了老公大哥的私家車去酒樓。我想，有警察協助的婚禮應該少見吧？事後睇返新聞，當日都有幾多示威者呢！

Photo by Anna C (化妝師係教堂入面影的)