Blog > 生活 : : 婚嫁籌備 > 極速ko婚戒

極速ko婚戒

2012.12.16 | No Comments

鑑於之前在wow看到介紹在沙田一些小店買婚戒,而自己在這個項目上又無咩要求,所以標準都是以便宜為先。於是約了Brian今天返完教會去看看。我之所以對婚戒沒什麼要求是因為我對微小金屬有恐懼,對於微小的金色銀色東西有莫名其妙的害怕感覺……所以我從來不會戴上任何飾物……其他微小金屬如鎖匙及硬幣都係極度討厭,最好有膠套笠住……非必要都不想接觸,所以八達通對本人來說是偉大發明。

拍拖後已經有想過這個戒指的問題,但一直都沒想過解決方案,然後到了真的要結婚,始終都要面對這個問題。我想到可以做的當然是結完婚之後收埋佢,但無論如何,都要戴一日……咁都係要買,我真係有想過買膠的!!!但我肯定會比人恥笑,也有想過買些街邊貨(汗)……不過今日都係有乖乖去睇。(可能有人問,那你的定婚戒子呢?因為Brian知我討厭這些東西,他當然用他別出心裁地用他的創意做了一隻給我!呵!反正又不用show比人睇)

由於忘了wow友講間野叫乜名,今日行晒沙田中心同沙田廣場所有金行同珠寶行的櫥窗望,站著望已經付出了很大勇氣……嘩!好多都好貴!小店都去到五位數,六位數都有,好驚!(我一見咁貴就同Brian講,呢個價我可以去影oversea pre-wedding啦!點解我唔比呢筆錢去影相走去買埋呢d野……我完全係已經影到痴左線)之後有間賣情侶戒只係三位數,諗得過喎!但真係一個圈,太平滑的金屬我見到更加毛管凍……

不過,最後竟然有間櫥窗展示了一隻我一望就覺得我應該接受到,夠膽放落隻手試下的款式(對不起,因為我一直恐懼沒研究這種叫乜款,不過都有粒石,幼款)然後Brian又同時覺得佢都接受到這個款,重點是價錢都在我預期之內。不過原本今日只是來看看,覺得如果就這樣入去試會不會太衝動。不過難得睇到我有興趣,Brian都有衝動帶我入去試。結果都係再行去食完lunch,請教了他哥哥和上網揾完資料才去試。

基本上我覺得自己好似隻水魚,入去坐低,試完已經有衝動買,因為這簡直是我難得一次夠膽戴戒指上手……不過唔試唔知Brian隻手咁幼……連個店員都估唔到佢要咁幼。之後我都未講,個店員已經減埋價比我地……Brian問我要唔要,我都拿不定主意,我說反正你比錢,你話乜就乜,就這樣,兩條不知有無做了水魚的水魚就這樣比錢買左……然後還跟我說兩小時後就可以改到size比我!有無咁快呀?不過最後我都講聽日先返去攞,因為我是行完街先去試,不想再呆等。之後姐姐才what’s app我要不要刻字,我先問下個店員,原來刻字不用加錢,她還說可以到明天取貨時再刻也不遲……不過刻咩字呢?我都諗唔到有咩好刻……之後店員還問我要不要看手飾,我只是想盡快買完離開,面對那麼多閃閃發光的東西,女人大多好高興,但我係好驚!
總之戒子的實際照片可能明天先有。

回家後Brian說沒想過買有石的,因為我都無要求,我其實也無要求,因為我都唔想戴,只係太平滑得個圈我真係接受不到,不是接受不到無咩鑽石,而係我真係好驚……我諗以減少恐懼作標準來買戒子的人真的絕無僅有……我真的覺得可能我係2013年最騎呢的新娘……

回家後同阿媽講買左戒指,佢問我係幾多K金,我仲話唔係金色架,我最憎金色……之後Brian同我講我地隻係白金,18K金,乜原來銀色都係金?我以為係銀……完全一個白痴……

後來我同Brian分析點解呢款戒指我睇得上眼,第一當然係價錢,其他就係佢中間凹左個位放粒石,同埋表面有磨沙,唔會睇上去滑滑咁。

由於我家又係無乜人喜好珠寶手飾,所以我都無乜呢方面資料可以知,家人也沒什麼意見。

另外今日通知了另一個姊妹邀請她做MC,雖然她好像有些受寵若驚,不過都答應了。還有就是再口頭上通知她們不會有姊妹化妝提供,因為我媽同奶奶都不用我揾人化妝(我媽不停話那輯化左等於無化的妝容好過我試妝呀,其他pre-wedding妝,這樣就知我媽完全唔buy化妝,所以我走去素顏自拍佢都幾buy),因此連帶姊妹都不找化妝,又慳一筆。其實我上wow至知而現在找姊妹化妝是指定項目,因為我以前做過別人姊妹,別人連姊妹衫都無提供,所以更加沒想過需要找化妝,總之現在大家都無異議就皆大歡喜。

發佈留言

發佈留言必須填寫的電子郵件地址不會公開。 必填欄位標示為 *