3B 23

七月二十日，我懷著有點緊張的心情，一早起身跟媽媽坐73A去北區醫院，為的就是入醫院做牙齒矯形手術。搭了個半小時車，終於入到去上水。去到第一時間照威記的曾醫生講，去了LG個牙科部搵另一個醫生。
入到去，這個周醫生又問我一次明唔明個手術點做，說實的，佢地講極我都係唔多明，簡單一點就是把下顎骨cut短佢然後把下顎退入少少讓我不再有「倒及牙」（倒及牙即係下面的牙合住上面的牙，一般人應該係上面牙合下面的），這個手術要全身麻醉，而且將會拔掉兩隻牙（其實我之前已拔掉上面兩隻健康牙齒，今次又拔，我總共無了四隻很健康的牙齒……嗚……）由於手術是全身麻醉的，之前威記醫生問我拔不拔掉智慧齒，因為向橫生了！我想了想，反正都全身麻醉了，是但做埋囉！所以今次手術我拔了三隻牙。
看完周醫生，就有人帶我上病房，我住的是3B 23，是外科手術病房來的，入到去記得有個同我差不多年紀的女仔等緊出院，對面有一個約四十幾歲的女士也在等出院，我隔離24床就是一個唔多願動的阿婆，再隔離24a係一個細我五年的女仔，好像在大陸坐電單車飛左出來……入到醫院那天，真係唔多適應。阿媽走時我都哭了出來。咁大個女第一次住醫院，仲要一住住成幾日，唔驚就假！第一日在院無所事事，不過想不到我媽下午突然在未到探病時間再來找我，買了我最喜歡的薯條，那餐是我在周醫生那裡抽完血用來補充體力的！第一日雖然醫院有飯吃，但吃完一點都唔飽！晚上那天媽媽要回家煮飯，幸好我的好朋友加summer project拍檔Brain挨著肚餓來找我，由探病時間五點半陪到我八點半才走！那天好彩有佢係度陪我，我先好好挨過了三小時！那天真係感動到哭，哭到眼都紅腫！>< Brian走了後，我唔理三七二十一立即上床睡覺，乜都唔想諗，而且眼紅紅，唔想比人睇到咁醜怪。個護士叫我去洗頭都唔去……第一晚在醫院醒了幾次，好不容易挨到第二天。
第二天話易過唔易，話難又真係有點難，六點幾起床，一直驚到七點幾，姑娘終於叫我換做手術的衣服，基本就是脫光光然後著一件紫色衣服載頂帽就算，我以為我做個口唔洗咁麻煩，結果都係要搞咁多野。推我落去手術室前俾人叫了兩粒藥，吃完已經想睡，但又未睡著，去到手術室前看到很多同我差不多的病人，但他們應該做別的手術，個個都係比護士問有無藥物敏感之類之類的問題……問完就正式來料，推我入手術室，看到天花皮的大光燈，隱約聽到威記那個睇開我的護士叫我，然後有幾個謢士唔知係我左手搞乜，根住比左個類似呼吸器的東西我吸，其實係整暈我的麻醉藥來的。之後不知隔了多久我都沒知覺了，好像有記憶時是覺得有人抬我返去3B 23，隱約看到個鐘，唔肯定係十二點定二點了！那天迷迷糊糊的，曾記得周醫生上來睇過我，話手術幾順利，隔離仲有另一個醫生！之後開始被人吊鹽水同禁食！（其實根本吃不到野！）講野開始講唔到，挨到五點半，終於見到我媽同我爸，佢比左鏡我睇我個樣，我貼著紗布幾樣衰下，因為紗布都係血……>< 我那天半夢半醒，但又不太睡得著，有點噁心感覺，又噁唔出，個口有少少痛，但麻痺多一點！我爸媽同我坐到七點幾便回家！之後Brian就來了看我，佢個樣好似好擔心我。我那天記憶有少少模糊了！佢又同我講返個project進度，但佢逗留了不久便被姑娘趕走了！那天晚上，我隔離及對面多了兩個新病人，隔離那個嬸嬸對我幾好，因為剛做完手術，我又吃不到東西，手軟腳軟，結果要在床上比個尿兜尿尿……好樣衰，隔離那個嬸嬸抬我起身去，因為我不坐係度去不出。不過晚上十二點個護士已經叫我自己抬著個鹽水去洗手間了！但對面那個阿婆就難搞啦！佢神志不清，第一日入來醫生問佢仲識答話係醫院，半夜已經話自己係深圳，又不停叫同想走，結果比姑娘縛著。第二天晚上過得很辛苦，因為頻頻尿急，阿婆又吵耳，睡不到幾小時。 第三天(星期四)精神好多了，晨早十點幾終於見到幫我做手術的威記曾醫生，佢話我應該五或六就可出院，我叫佢比我星期五走，佢又唔肯定，好擔心，但跟住有人用輪椅帶我去搵周醫生時，佢又話我星期五出到院，那天都唔知信邊個好，唯有祈禱叫神比我星期五走！結果真係走到，神果然一直看著我！Yeah~ 下午終於可以開餐，不用吊鹽水了！不過左手仍然要留返條管打針…！隻左手仲痛過個口！雖然可以開餐，但全部都係湯同蔗水！好過無吧？晚上有車厘同橙汁呢！那天晚上我爸媽見我行得走得，紗布都掉埋都好放心，我又無發燒，應該星期五走得，我當然都係咁望！唔想再對住那個神志不清的阿婆了！我阿離個阿嬸又住左一日就出院……那個細我五年妹妹又調去骨科病房，24床個阿婆又轉去內科病房，得返我一個同另一個經常睡覺的阿婆跟呢個亂叫阿婆作戰，真係要了我小命……Brian第三日都有來呀！^v^ 我爸媽都見到佢，想不到我爸媽都幾識做立即行開比我慢慢同佢講project同reg.科！佢繼續陪到我比姑娘趕！那天比佢講了幾個笑笑話搞到我哭笑不得！（因為我唔可以笑得咁勁，個嘴開唔到！） 第三天晚上我試著要自己早點睡，本來我十一點係睡到的，點知十一點幾姑娘又來同我打針，之後阿婆一直叫，好不容易我才睡到三點，醒了又睡，五點又醒，跟住阿婆吵得太厲害，睡不到，個阿婆又自殘，認真救命！後來不知自己如何再睡了！睡到七點起身，姑娘抬神志不清的阿婆坐沙發。跟住佢不知叫了我幾多次叫我幫佢解左佢的縛帶，我也不知答了佢幾次我唔識脫！佢得閒又問我出面的掃地阿嬸係咪我大家姐，又問我姐係邊……認真救命！難得睡在她旁的另一個婆婆仲可以睡得那麼好，厲害！ 最後一天在醫院的經歷，沒甚麼特別吧？醒了就一直死撐等周醫生來搵我，結果等的途中看到神志不清婆婆不知用甚麼辦法搞到自己成手血…… 好恐佈！佢經常叫護士姐姐做師奶，搞到姑娘好火！哈哈！第一次同另一個睡覺婆婆多了接觸，比左少少水佢飲！那個婆婆之前真係幾可憐，佢已經好瘦，之前仲要佢照胃鏡狂比瀉水佢飲……第四天佢同我一樣只能吃流質食物！最後一天我等到九點十五分，終於有人接我落去搵周醫生，聽到佢話走得真係開心到不得了！再對著那個神志不清的阿婆，我都驚自己神志不清！（忘了說昨天周醫生搵我時問過佢自己乜血型，想不到自己是O型血呢？）接著就是打電話等我媽來接我，等的途中同Brian講電話打發時間。阿媽來到後，走都走不及，不過身體唔多好，因為吃不飽。一直飲湯水點可能飽？在醫院等左成半小時才取到藥。然後搭火車回家。 媽媽回家後煮了米通粉吃，難吃都吃完了！因為太肚餓，接著開始做功課，隻左手開始有返少少力，但都係運作馬馬……今天洗澡洗頭由媽媽幫忙，免得整到下巴！洗全身自己就無乜問題了！幾日無洗澡，突然覺得洗澡太棒了！晚上吃另一種通粉，不過吃了一半已經想噁！唔知點解頂唔順那些味……但飲甜野就無問題，看來呢排都係飲多點甜野好！呀！我還吃了兩條剪得很碎我才吃到的珍寶腸，其實我都仲係唔多飽，但真係無乜胃口囉……所以呢幾日都要係屋企叫Brian入來同我一起做功課，返唔到學校做了！但星期一要present了！我們要加油呢！雖然我估計我到時都出唔到聲(我面又腫又痺)，無聲出人都要去撐場架！>< 我要加油了！讓體力快快恢復！ 好長的一篇無圖雜記，本來想影被拔掉的牙各位看，但後來又嫌太血腥所以無影！牙都佈滿了不少血，隻智慧齒仲要比我一開二！搞到我爸以為我比人拔掉四隻牙呢？