Blog > 旅行遊記 : : 二零一四.夏 : : 日本 > DAY 7 . 池袋 > 東京Skytree > 台場 > 池袋

DAY 7 . 池袋 > 東京Skytree > 台場 > 池袋

2014.05.30 | No Comments

第七天,依然要早起,仍然是行程豐富,無book到呢間酒店的早餐,但今天都因為太趕,一朝就出左去搭火車到上野,然後再轉巴士去Skytree。事源同事之前去過Skytree要大排長龍,結困人多到排不到。於是我出發前做下research睇下點樣有機會順利上塔。我上網check如果一早去就可避免情況。Skytree開八點半,所以決定一開門就去,但結果其實都遲了少少,搭遲了計劃要搭的巴士,但去到都係差不多九點左右的時間。

巴士在底層停站,但底層原來是比團體使用的入口,結果跟同車的印藉人士一齊找了一會才知道要搭電梯上去才是一般遊客入口。看到底層已滿佈日本學生已驚驚晨早已人頭湧湧,幸好上到一般遊客入口發現不用排隊就有得入了!我還心想人多會不會是騙人的?

Skytree有分兩個階段,要上再高一點,入左去之後還要另外收費,但我覺得高少少望的風景應該不會有不同,最多人少一點,所以沒買票去了。其實上乜塔上到去看的風景都是差不多,只係Skytree還算新景點,怎麼講都要去一次試試。繞了幾個圈,影完相同係上面買左少少野就返下來,手信都貴貴地。落返下面,發現還有手信店,接著又去買了!買了Skytree百力枝!之後因為未食早餐就去左揾野食先,試了M記的世界盃足球包,當時香港未有,回港無奈都有售。但個薯波日本好食過香港的好多!

食完就開始行街,原來Skytree有咁多舖頭架!事前無點做東京的research,因為覺得自己去了好多次,事前只打算去這裡的輕鬆熊專門店就算,怎料又有各電視台的商品專門店,有EVA的Skytree限定,老公再次跌錢……但輕鬆熊專門店竟然無想要的限定雞,才開賣一星期就賣完了……只餘下限定熊……不過最後都入手了一個Skytree限定熊旅行袋,之後都有開來用。

接著有一層有好多特色手信店,因為無預咁多行街時間所以都快速逛逛就算,不過臨走入了一間賣護膚品的店,入面有吸油紙試用,形狀是Skytree形,用完會顯現整個Skytree出來,好搞笑!但形狀太奇怪了,不便收藏,不過老公卻買了一pack 白兔cream自用……他的護膚知識應該比我還好。

離開去搭地鐵時發現有龍貓專門店,但覺得應該間間差不多就無入了,但回港後同事卻跟我說那裡有些特別的影相位,miss左啦!都無法啦……或者有機會會再來一次!

離開Skytree就搭地鐵去新橋,再步行到隔離海歐線,無諗起原來新橋站跟汐留那麼近。結果可讓老公看一看那裡的奇怪藝術品及宮崎駿的大鐘!其實腳軟軟,但海歐線這無人駕駛列車依然一堆人及旅客,幸好找到一個單座位都照坐了……路經彩虹橋很多遊客舉機影相,我已去到無興趣影了……

當日好熱,太陽好猛,我們在台場站下車,因同富士電視台好近就帶老公入去參觀,有看到現場錄拍節目中。入面介紹的節目不太認識,主要為了到此一遊而入。不過電視台卡通記念品店有些看頭,也有看到one piece餐廳,但無咩人,價錢也貴無入去,在門口望完就算。離開前有跟這裡的電視台吉祥物拍照。

之後就行去今天要去的Diver City--看台場新建的1:2高達。要不是帶老公來睇高達一定不會再去台場,真的看到有些悶了……三點鐘有一場高達show,我們先看了那場show,其實就是高達個頭會擰下,冒煙,晚上的話會有燈光效果,但累到不等到晚上了……場show表演其間,有很多fans行近拍照,有些阻住晒我影相……

睇完入了去food court休息一下,因為暴曬完又腳軟,老公心情開始不太好。休息完後再上去睇那個高達展覽,最初入錯電梯去了後門,要繞圈到另一邊再搭電梯先上到去。之後我地比張預約券比職員,佢地好似未見過係乜來要研究了一下才知可以換入場券入內。高達展館入面不算好大,但我沒睇過高達主要陪老公睇,其中有個裝置可以call高達的人物出來影相,我只識阿斯蘭同馬莎所以就call了呢兩位人員出來影相。還有一個巨大高達頭可以付費入內穿埋制服影,我地當然就不會比錢,在外面揾工作人員幫我地影就好了。

後來有工作人員話有高達影片睇,咁一場來到當然睇,原來係好似太空館的圓型天幕投射影片出來。總之又是機械人在宇宙大戰,星星看到眼花花,不過都幾精彩!之後都是在展館看模型,拍照,聽下主題曲。來過就算,不值再回來一次。

出來之後再度腳軟,係Diver City 揾左個位坐休息下,咁岩那裡有wifi就順便上下網,怎料看到阿安問我係咪在日本約食晚飯!其實還在香港時有問過他會不會五月在日本,有想過找他幫忙買Skytree入場券,但之後不了了之,怎料到自己旅行時他真的在日本了!剛好他又問我吃不吃飯,就直接問他當晚會不會去池袋,可以一起去吃一蘭拉麵!最後我約了他直接到池袋酒店找我!WoW!在日本遇到熟人實在好興奮!

之後我們行埋去台場另一邊的Aqua city影假自由神像及日落,再上埋Decks裝修到舊日本特色的那層睇下~不過之前來過有的台場小香港及運動項目遊樂挑戰區就拆掉了,連吃過的跳馬包餐都沒有。

急速行完台場又急速回池袋了,回到新橋時還問老公去不去銀座,不過今次我同佢都頭降了……然後帶著疲累的身驅先回池袋酒店等阿安。因為我要回酒店先有wifi,所以之後都等阿安同我聯絡,直到八點幾左右看到阿安一個message說他就在房門出面!哈哈!他原來驚叩錯門所以就留message給我,看到他的message就去開門了!第一次去旅行會在酒店房跟熟人見面,好開心!之後我們就一齊去了一蘭吃拉麵,又係要排隊……不過阿安就話來池袋應該去吃”無敵家”,所以食完一蘭就叫了阿安帶路去睇下呢間野,那時都快十點了,但門口仍是人頭湧湧,很多遊客仲排緊隊,看來下次再來要試試。

之後我地就去左昨天夾到公仔間夾公仔機看看,告訴了阿安昨天的戰積。然後再入了一間部部都係100yen的夾公仔機看看。店內看到不停有人中獎,都有少少覺得不可思議,我們還笑說是否騙人的。怎料,突然有名女子跟我們用廣東話說︰「你地可以叫職員擺好個位,話比左好多錢都夾唔到,咁佢地就會擺到個好易夾的位比你!」由於這名女子跟一名外藉人士一起在玩,她的衣著打扮實在不像香港人,所以也想不到她會突然向我們搭話。

好啦!看了那麼久終於又到老公出場,其實阿安已經先試一仗,但失敗了……之後老公鎖定一部100 yen夾熊大公仔看書的公仔。老公先試用100yen睇下值唔值得投資,怎料,一次就夾到啦!!!我們頓時笑瘋了!實在是意想不到的收穫呀!之後仲係門口拍了好多張笑瘋了的照片!超開心的一晚呀!夾完我們就道別了,回香港再見。

終於來到最後一晚,執行李又執到好夜先訓,不過明天也不特別安排節目,只留在池袋逛逛就好了。

發佈留言

發佈留言必須填寫的電子郵件地址不會公開。 必填欄位標示為 *