裙掛與教堂

裙掛這個項目其實我早在九月已經完成，事緣是用了酒樓送的coupon去了金XX免費租了件珠片裙掛。由於對這個項目無要求，我真係無做任何research就租了……之後係wow才知道很多新娘對裙掛都那麼執著。但之後同Frankie及Joyce見面被他們提完一些新娘在金XX租衫不快經歷，以及在網上都看到一些bad comments後開始擔心起來，心怕那天自己也會遇上類似不快經歷。

接著就是看到有wow友$380租到潮掛。於是就去試試看！反正金XX那件我免費租訂金也不用比，最多到時不去取。其實wow友介紹那間是一間studio公司，出租裙掛款式好少，但都看到有興趣款式，開頭有諗過潮掛，但我媽話唔係個個著得好睇，最後試了兩件就決定租了！(最終都不會去想那些很多金線的傳統掛，都係那句，好憎金色！)是次試掛又帶上媽媽，今次男友也來看了！這件比起金XX那件色彩繽紛很多！不過應該都係叫珠片掛？水晶掛？算啦！反正我媽原本對禮服都無乜要求。

負責人還叫我可以考慮幫襯他們的姊妹化妝，但我心諗，其實我無打算提供姊妹化妝……原本就不打算大搞，只係因為阿媽要擺酒先好似要搞大，但其實我其他野都係堅持慳得就慳。

有關晚裝我已經煩死了！因為我最近又係淘寶睇中一條短裙(又係泡泡裙)，可以送客用，但敬酒那條已經係一條紅黑短泡泡裙，我都唔知會唔會著得太多短裙，搞到心大心細，雖然家人同男友都支持我，但我都還是拿不定主意，又不想亂花錢亂淘。其實穿短裙有乜問題？昨天有人看到我的婚紗相說我穿短裙影好特別，話好少見人咁著……好煩呀！其實唔洗理人點睇，自己鍾意就得，但我而家仲係煩緊！只係擔心唔穿長裙會唔會有外人話唔夠隆重之類……

之前我同人講，晚裝父母他們自己處理，又被外人話小心父母口不對心，應該同佢地去租。點解個個都好似講到我好唔了解我父母？我昨天試完掛試著問我媽打算去哪裡買晚裝，她說穿家裡的衫就得(汗)……至於我爸我媽就一早打算新年後幫他返大陸訂一套。老實講，之前去金XX睇過那裡的長輩晚裝真係好老土，我都覺得一點都不襯我媽！我媽對我穿什麼都無乜要求，何況自己？=口=” 但我個人認為我媽就算穿現有的衫都不會差！始終我成家都走自然系……

昨天同一位曾幫她做過姊妹的朋友傾談她之前結婚的事，有時我真的很羡慕她，因為她對婚禮無任何要求，總之完成了就ok，甚至昨天跟她提起她結婚當日發生過什麼事她好像都忘了……(汗) 但有時我真係覺得自己太有要求太執著好煩！煩到我都覺得自己討厭。不過我那次唯一做姊妹的經驗應該比了我很多或一般新娘都無想過的體驗。

其實原本不太認識那個朋友，本身跟她的丈夫比較熟悉，早幾年有幸見證他們那個原本不是求婚的求其求婚，讓我認為求婚真是不用必需的花及戒子。他們籌備婚禮才只有九個月時間，是我見過用得最少時間，而且籌備過程，由我與男友被邀請做兄弟和姊妹團一直都是由男方提出，之後任何籌備過程我從來只見過新郎搞，沒見過新娘搞！事後到我開始籌備，問返呢位新郎哥取經，他都說由頭到尾都係佢搞！勁！我真係未見過一個新娘連姊妹都由丈夫一手幫佢揾晒！所以什麼姊妹裙姊妹化妝更加不會提供，這也形成我都覺得無需要提供姊妹化妝的觀念。雖然種種求其，連係教堂行禮都可以大頭蝦到牧師祝福時自己行左出禮堂，但這可以說是我最難忘的婚禮，因為真係好好笑！而且因為他們無咩比姊妹做，我甚至以為姊妹工作是極度輕鬆，負責玩下新郎就有利是收，晚上又不用一齊敬酒，成班兄弟姊妹團只係坐埋一枱嘻嘻哈哈成晚，後來看過我表弟結婚才知原來兄弟姊妹都幾多野做……(汗)其實過到自己真係簡簡單單做齊長老要求就可以，我真係好羡慕，希望自己都接受到這種自己開心的心情……但，我仲未接受到，唉……

另外婚前輔導已經進入第二課，第一堂做的問卷分析結果出爐了！想不到我們有多個項目分數偏低程度令人驚恐！全部是極度有待成長……我們兩個心智未成熟的小朋友真係要加把勁！哈……另外，原本證婚場地交了給Brian負責，但因為自己開始按耐不住，打左成個月先打得幾間，心儀的教堂又無位，結果自己昨天一起身就狂打電話，現在有間心儀的都有位，立即send了申請表出去，希望會有佳音，求主引路！