結婚前一週年紀念與自拍

之前見有wow友係結婚前一週年出去自拍慶祝，於是一早諗住有樣學樣，仲叫Brian同人調間。但呢排天氣都一直馬馬，天氣報告又一直預測11月24日又凍又落雨，所以遲遲都未決定究竟去不去影。結果星期四晚我又任性地決定咩天氣都要影，又要Brian配合我。

但由於我自己都舉旗不定，結果星期六才晨早都匆忙地準備道具和婚紗(買左就用到盡)，但我上佢屋企換衫準備好諗住出發……他才告訴我還要洗澡……結果諗住十二點出發變成一點才出發去影相！開頭仲諗住行過去目的地，但因為我們下午又有事做要返教會，本身時間唔多仲要比佢拖到無晒時間，結果飛的士過去。

開頭諗住是日陰天又天寒地凍，應該人流不多，結果忘了還有cosplayers同畢業相的人，幸好這些人都沒有霸佔我想拍的地方。今日目的地又係返去第一輯相的大埔海濱公園，因為之前實在有些地方想影而那個free攝影師又做唔到我要求，跟住有考慮再揾free pre-wedding，但又要自己揾mua太麻煩，所以決定乜都唔揾，自己影算！當然結婚前一週年紀念才是主要決心出去自拍的契機。

最初諗住用Nikon拍，但Brian都仲係無去學用呢部機，唔識點focus，於是都係揾返自己部女朋友(GF1)影。最初我都負責做model等佢按時間快門鈕，但後來佢都係覺得同我個女朋友唔多熟，結果變返我來操刀，早知一早咁做唔洗我吹風吹到出鼻水。

其實佢開頭係幾不滿我搞埋呢d活動，之前join影相都係咁。但之後我們做返岩角色，佢做model我指揮佢擺pose影，後果大家都很滿意，佢有佢擺chok同騎呢pose，我有我按快門扮做攝影師，結果雖然無閃光燈幫助影出來的相又唔實色又多noise，但單睇構圖我都幾滿意，可惜因為當日太遲出門，影得兩個半小時就急住走人。但Brian愈影愈high，叫我下次再encore。(呢條友成日都係咁，成日可以一秒鐘之後態度立場360度轉變)

原來呢d咁小朋友的活動就是我們的浪漫……