日本 琪琪宅急便

DAY 6 . 心齋橋 > 大阪環球影城

2016.04.11 | 旅行遊記: :二零一六.春: :日本 Leave a Comment

老公事隔九年,再次重返環球片場!而我只是事隔四個月又再來,但最新的恐龍過山車已開。為了爭取最多時間,我地又係要一早起身去環球片場!但可能昨天真係行得太累,所以今日係唔知醒。幸好環球片場比起迪迪尼距離較近,遲左起身都不算好大影響。原本想行去難波站搭車轉少程,但因為遲左起身又唔想行,都係搭地鐵轉多程算。

其實到達門口還未開門,先影了指定的地球照再排隊。基本上plan行程時都plan好整日玩樂行程,而且買了fast pass關係,主要都係跟fast pass時間行事。不過原本入去以為可以睇左Minions show先,但等到差不多十點又不覺,於是回頭先去看「進擊的巨人」4D。不肯定是否坐得太側,感覺不太立體,而套片有一格focus了利威爾的大頭,感覺完全是為粉絲而做的!又或者因為巨人套片是看主角飛來飛去,但4D影院始終係坐係原地,所以較難投入。睇完戲就行左去影下巨人裝飾,買埋EVA爆谷。

之後發現有返Minions show(工事中)就去睇,雖然明知無聊,反正最期待完show後有得同Minions影相 XDD 今次終於不用坐左係後面個show做乜都睇唔到啦!同Minions影完相再周圍行,也發現另一個Minions(火事中)的表演也完了,Minions站在消防車上比大家拍照,這裡的Minions不會下車,只能自己站在車前隔空合照。之後發現有日本家庭全家人打扮到調查兵團的模樣(化埋妝),非常有型!見有人找他們合照,自己也走埋去影左張!

接著等夠鐘入哈利波特園區,又係未夠鐘就走去隔離同條大白鯊影相。之後老公又同佢個EVA桶影相,然後就夠鐘入哈利波特區。由於四個月前先來過都無咩驚喜,影左幾張相,周圍望下就去排玩禁忌森林。但比起十二月那次,今次無買fast pass都只需等50分鐘。不想買pass的朋友不妨試下淡季來。老公玩完禁忌森林,立即同4D巨人比較,哈仔完全係好玩N倍。即使第二次玩,我都仲覺得好好玩。之後見魔杖館人少就帶左老公入去,明明之前有提過他有咩睇,但到發光那一下他還是笑了!

至於園區的過山車都要排成個鐘就無玩,因為只是兒童過山車,無謂浪費時間。另外也有看到真的貓頭鷹及新的魔法表演(事後回港至知是新的)逛得七七八八就離開哈利波特了!(今次不用買怪糖同飲品,這裡安全無失錢離開)

之後行了去最新裝修好的侏羅紀區睇新過山車,真係望到人玩都驚……接著就去吃午餐!因為看到人吃Minions餐就覺得自己都要去吃(感覺賣相最得意) 開頭係門口見到個Minions餐都賣得幾貴,但後來發現配菜沙律原來係自助形式隨意裝就覺得好抵。所以最後叫了一個Minions包餐同Minions卷蛋,勁食配菜去餵飽自己。

吃飽就去霸位睇巡遊,適逢USJ 15周年,所以有個特別為呢個活動搞的午間巡遊,有噴泡泡的車,Minions花車等。開始前還有工作人員教大家做下動作,我開頭以為係搞下氣氛,怎料係呢個巡遊係非常互動的,大家都會一邊看花車一邊跟住跳,雖然唔知跳緊乜,但來到樂園都係要投入下,所以都有係咁二跟住跳。跳左一陣,佢地會叫群眾行到花車前,然後會派彩紙同一齊蹲下身,倒數三下再一齊彈起身拋彩紙!雖然唔多明日文,不過都有跑到Minions架車度玩下。玩左一次就離開車群,但行了去另一邊又見返隊花車仲巡遊緊,結果一齊彈起放彩紙呢下我玩左三次……哈哈!

由於未夠鐘玩kpp過山車,所以行了返巨人館同班長模型影相。返回kpp過山車,玩這個最值得用fast pass,因為至少要排100分鐘。舊年跟姐姐玩這個未改裝做kpp的過山車時,車會自轉,都有些恐怖。我個人覺得係加強版space mountain。但今次kpp過山車賣點是戴著VR玩,車沒有自轉功能,後排也不坐人。明明這個過山車是有時限的,但排隊的裝飾都完全整過配合kpp風格。

這是我第一次玩VR,仲要係戴住來玩過山車,是一次有趣的體驗。由於畫面開頭都會顯示路軌,你會比虛擬影象欺騙了!因為佢行行下原來會急轉彎,但畫面的路軌卻是一條直路,所以那一下會聽到不少尖叫聲!整體都是好玩,畫面的公仔都幾得意!玩完過山車,又去左monster hunter行一陣,因為EVA影院還未夠鐘入場,仲有食左使徒包包,包裝似要打開AT力牆。

4D EVA比巨人感到好玩一點,可能因為扮坐係EVA上,做到跑步的重量感。但劇情是跟最新的劇場版打使徒,都幾暴力血腥下!最重要竟然睇到最後一刻是待續!!!仲以為隨便睇下一套打鬥短片,去到最後竟然無結果。唯有等老公同我講下之後少少劇情吧!絕對覺得呢個Cool Japan下年會繼續出,EVA4D又再繼續做埋落去。

成個fast pass差包飲品就完成任務,之後就開始shopping行動!原本叫老公去玩多過個過山車,但single line都要排80分鐘,恐龍仲要夜晚比private party包起左想排都無得排(不過老公都話望落有少少驚)結果係EVA同Minions瘋狂shopping完,再換埋monster hunter飲品,就行左去兒童王國睇下,仲玩左幾樣低B野包括咖啡杯,同一個少少迷你海盜船的滑板車。其實當日天氣極凍,最後頂唔順入左室內Snoopyland取暖。玩埋我第一次去USJ玩過的Snoopy過山車,老公話呢個比兒童玩的過山車都算幾刺激,幾好玩。離開兒童王國再一次行去恐龍區,商店有個位可以同隻假恐龍影相就順便影左張(其實我想睇真人扮恐龍出巡,但無特別留意時間結果看不到…)

最後就係等睇夜間花車巡遊,其實四個月前跟姐姐已看了一次,一模一樣的,但老公未睇過都陪佢睇,以童話故事做主題,都靚既,但看完真係即走,因為好凍,呆坐睇係凍到傻!

一出去立即揾晚飯食,入左去有人推介的Eggs ‘n Things,但因為我以為這裡食蛋出名就同老公都叫了班尼蛋食,怎料原來這裡個個都要食pancakes……但班尼蛋已吃飽人,唯有等下次機會……

吃完野暖返身,再襯出面的商店未關入了去Jump shop同百力枝店看。原本諗住搭車走,怎料係正車站隔離間夾公仔機門口放左貓咪收集的公仔!入去看看有部機有希望,又望左人地夾其他機見個夾任推到滿意先需要夾就決定投資。最後又比老公成功夾到兩隻啦!只用了1000yen就成功了!好開心!滿載而歸!

DAY 5 . 心齋橋 > 大阪造幣局 > 梅田 > 天王寺阿倍野 > 心齋橋

2016.04.10 | 旅行遊記: :二零一六.春: :日本 Leave a Comment

第五日的活動終於稍為輕鬆一點!主要都是安排逛街購物。不過之前我姐介紹我一定要去大阪造幣局看櫻花,因為每年只開一星期,而我又遇上那一星期,所以我必定去看,入場是免費的呢!適逢那天是星期日,很擔心好多人,所以一早就出發了!不過由大阪開始住的酒店都有包早餐,出發前還是要嘆下自助早餐。

吃完早餐,正式出發,主要搭地鐵到谷町線「天滿橋」站下車,基本上出到去已有齊指示,開始封路跟大會安排行去就是。不過在車站門口有售相關紀念品,還是買了盒日本貨幣造型的餅乾。之後就開始不斷跟指示行入去造幣局的櫻花大道,途經很多商店,售賣著各種小食,但早餐才剛吃不久,未有心情再食住。

好不容易跟著人潮去到櫻花大道,有保安拿著大聲公叫人不要停流向前走(好嘈)。而他手持的指示牌都寫中文,肯定是比遊客睇。基本上除了大量日本人,這裡也有大量國內地人、香港人等等。我想這裡裡人多就如同去香港花展差不多!

這天唯一缺點就是陰天,沒有陽光影櫻花較失色。但櫻花種類真的好多,全部都係較遲開的櫻花品種,也有不少垂櫻,另外也發現有綠色的櫻花,很多都很漂亮,只是陰天又人多就難影到靚相。迫完影完感受完熱鬧氣氛就離開這裡,離開時要沿著河邊走,沿途又是大量的小食店及攤檔,在這裡買了一隻小雞公仔,還有老公要買香焦朱古力食。幸好早去,愈遲愈多人!

然後我地再搭返地鐵去東梅田站(因為不用轉線),然後去了梅田的蟹道樂食午飯。今次真係唔洗排隊又唔洗預約,直接有位坐啦!雖然這間沒有外觀大蟹,但內裡的環境真的好高級。午餐價錢唔算好貴(雖然都比平日午餐價錢為高) 我叫了有六道菜的蟹宴「都」(25xx yen),而老公則叫了有10道菜的「華舞」(39xx yen)。喜歡食蟹的朋友可能好滿足,但我這種對蟹興趣一般都是吃過就算,主要覺得食蟹真係好麻煩。這餐吃了很久,因為每道菜真係慢慢上,而老公有個蟹飯,更是成鍋送上來之後才開始煮飯!所以這餐比我預計用多了一點時間,但整體都是愉快的體驗,因為真的感受到自己是上賓嘛!

上完蟹就出發去Kiddyland shopping!途經布甸狗café有叫老公看看,原本有諗過來吃,最後都係食蟹道樂。到達Kiddyland,我們先逛了最底那層,再上去輕鬆熊專門店。今次雖然有限定雞賣,但這款偏偏整得唔靚,結果竟然出奇地買了啡熊同白熊的限定版比爸媽。之後老公在P助和粉紅兔兔那裡也看了很久,最終買了本書。另外也買了外來貨的老鼠電話殼。

去完Kiddyland shopping都無乜時間行梅田其他地方(再加上其他地方都不太岩睇) 然後就搭地鐵去天王寺站,去睇下大阪新的shopping centre阿陪野!九年前跟老公來天王寺的記憶只有去Animate,事隔多年,那條環迴狀的橋依舊在,不過隔離都興建了購物中心。其實對名店shopping無興趣,但就想上阿陪野上面的空中花園睇下風景!當然佢有更高的空中花園就需要收費,當然就唔會比錢上去。另外也有美術館,正值展示畢加索的美術呢!(香港已看過) 影完風景就返左落去,行了對面有另一間輕鬆熊專門店看看!不過雞量比梅田仲少,所以都係得個睇字……之後仲行埋去Animate那裡逛逛,不過都買到野。Animate落一層係池袋24小時營業的JEANS MATE。因為老公中左鴿屎關係都想買條新褲,但結果看到在日本買新褲價錢都不太便宜……最後都係空手離開。

離開天王寺,終於返回大本營心齋橋,急急腳去行了自己心儀的商店,例如Sanrio、迪迪尼(老公買到大眼仔公仔,不過公仔其實係用來掛窗廉用) 知道老公喜歡一個白兔護膚品牌,都同佢去左難波park的分店睇,那裡的sale不停向我講解,但其實我係無咩興趣睇,哈哈!我想個sale一定覺得我地好奇怪,係個男人不停睇來睇去,個女人只係後面跟住佢……另外也在同一個商場買了沖純的鹽甜點。因為差少少錢就可以退稅,為了買到可退稅的金額去了Village Vanguard揾下有無野岩,最後買了包寫住18禁的咖喱!係商場揾退稅都花了不少時間,而且接近九點退稅櫃位都快要關門,幸好最後繞了一個圈都揾到,順利退稅,個人都行到散散地。

之後再返回道頓堀去吃迴轉壽司(因為舊年跟姐吃完有優惠券,又未到期可用)於是又排隊去食。其實都驚驚地,因為去排時都唔早,佢又講明左幾點last order,都驚到last order都未排到我地。幸好,最後都趕及last order入去食,立即拿拿淋拎晒d壽司同叫晒想食的壽司食。而優惠券贈送的是飲品或蜆湯,因為有兩張券所以我地各叫一樣。雖然這間只是日本一般的連鎖壽司店,但質素及價錢來說已抵過係香港食好多,所以都滿意這一餐。

食完之後又慢慢長征返酒店。

DAY 4 . 藤家旅館 > 奈良 > 心齋橋

2016.04.09 | 旅行遊記: :二零一六.春: :日本 Leave a Comment

第四天,把原本是安排第三天去的奈良改為今天去,由於要爭取時間好早就起身梳洗抬行李落樓,感覺只在藤家旅館逗留了好短時間,不過今天會把行李放在藤家旅館寄存,回程先返來取行李先會去大阪。其實藤家旅館有早餐提供,但我姐幫我book時無呢樣野所以都係要出去自己揾食。這裡吃一餐家庭式和式早餐盛惠1200 yen,下次我覺得我會試(雖然係有少少貴)。

接著又返去Mr. Dount吃早餐,叫了杯凍飲,不太好飲,結果趕去搭車時仲未飲完直接在洗手間倒了……今次去奈良是搭近鐵,還買了特急券搭特急列車,半小時就可以到達奈良,以爭取最多時間遊覽。

今次到奈良,事前已計劃了一個很豐富的行程。第一站先去猿澤池,不過到達大街時發現了老公目標要食的中谷堂吃麻糬,見人少少就立即叫佢買左來食先,我自己無試,興趣不大。

吃完就行了去猿澤池,set腳架自拍,其實那裡重點照只有一個位,就是要影到湖景同後面的五重塔。影相的地方有好多白鴿,有台灣人?內地人?同日本人在餵食。

之後打算行去格子之家拍照,怎料準備出發之際發現了一隻自由貓,偷拍牠之後還開始和牠接觸,派小食給牠肯食呢!第一次在沖繩以外成功派出貓糧!可是老公在此時也不幸受到鴿屎襲擊!擊中手和腳的部份……之後連忙抹身的同時貓也走了。

然後我們開始長征去格子之家,路程都有點遠。一路上有一班講國語人士,一家大細,吵耳又麻煩。途中參觀了一間奈良町にぎわいの家,興緻基本上都被那班人破壞。後來去到格之家,那班人看來沒跟上來,但感覺不太多東西看,不過總叫看到以前奈良的家居設計特色。之後回程去了元興寺塔跡看,又遇返那班麻煩人,所以看了一會就走了。

返回大路,上了元興寺看,但發現都差不多是午飯時間,就打算去奈良麵鬪庵食計劃要試的福袋烏龍麵。但去到才發現勁多人排隊,叫了老公睇下有無其他地方好食唔排,但最後都找不著而乖乖排了隊等吃,結果都排了半小時先有得食,店子很細,人又多,都沒怎麼影裡面的裝修。而老公入到去已急不及待要去洗手間再洗洗鴿屎。我在出面等到烏冬來他都未返出來。這碗烏冬真的全都裝在福袋裡,很想知烏冬是如何放入去?至於味道都不錯,重點都是賣相吧?

吃完之後急急出發,因為原本無預咁多時間排隊!之後就一直沿大路行去春日大社,沿路都有影下鹿仔,但無食物大部份都係唔多俾面影相。在春日大社預到真正的日本人結婚,穿白無垢呢!由於之前拍攝時看到日本攝影師會跟其他拍攝新人講句祝賀說話,所以看到這對日本新人經過時老公都用日文講左句祝賀說話!第二次來春日大社都係無比錢入去參觀,在另一邊出口又遇上另一對結婚的日本新人,但佢穿婚紗就覺得怪怪的,感覺在神社還是穿白無垢或色打掛會合襯一點。

離開春日大社就向若草山方向行走,路過一些商店有鹿餅賣又無鹿在附近,於是就買了鹿餅準備一會餵鹿仔。

若草山山腳部份有少少櫻花樹同鹿仔,想拍下櫻花同鹿一起的情景,但結果班鹿都係唔合作……回港再search下若草山才知道這裡可看到奈良全景,好有興趣再來奈良上這裡一看!(但若草山是要收入場費的)

離開若草上山腳,就行了過隔離的三月堂及二月堂,上一次來奈良都未去過這裡,原來都可以看到不錯的風景!奈良其實都好大。還有只在火車上先看到的西大寺是鹿男取景地,都希望去一次。

離開二月堂就向東大寺進發,由於自己入過去,時間又不太足夠,所以就沒帶老公入去,只叫他在門口影返張相就算。後來發現東大寺隔離的奈良公園範圍有不不櫻花樹,原來去奈良拍櫻花照大部份在這裡取景!(不過當日有太多旅客,早兩日又已看過櫻花所以只拍了少少就走了,鹿太不聽話了!) 最後在東大寺隔離尋找了商店去買柿葉壽司及大佛布丁!

買埋重點的手信食物,我們就急往奈良公園餵鹿,好想拍下美麗的餵鹿照結果是完全不成功啦!餵鹿都比預期用多左時間,結果搭了17:30的特急車回京都。

返到京都又係急急腳返藤家旅館取行李,因為原本跟女主人講好是18:00返去拎,Lily剛好又在門關住置,臨走都有Lily送別真係好開心!

之後開始用JR pass,搭JR返大阪,架車勁多人,好迫,幸好坐到加位,又有得坐個行李又睇得實。好辛苦咁迫到返大阪梅田,再搭地鐵去心齋橋。心齋橋個站好騎呢,由月台行返去閘口,要上又要落,咁都要搭左三次電梯先到。原本我姐幫我揾到有電梯的出口上返地面,但第一次行錯左搭了另一邊的電梯上地面,上到去完全唔知自己去左邊,幸好最後都揾得返去心齋橋,再揾到間酒店。這間酒店都算幾新,入面仲有部按摩腳的按摩機。但為了爭取時間,放下行李就立即再落去行街。

第一站是叫了老公買龍蝦包食,其實上次已同姐吃過,就算覺得不太好食都叫老公試一次。不明白為何要排長龍,到買完才知因為個收銀係新仔,所以製造了排隊的假象。不過包熱龍蝦凍呢樣野,連老公都覺得怪怪地,所以都吃過就算。

之後發現大部份商店都差不多關門,所以就去揾晚飯食,今次選了wyman介紹的Red Rock。聽說在東京是排長龍,但係大阪就不用點排,但要行到去美國村那邊先有得食,去到有人排緊,門口有購票機先買餐,但好快已叫左我地入去,我叫了普通的牛肉而老公就叫了較貴格一點的。但飯來到時店員沒介紹那個是貴的那個是普通的,看上去都一樣,所以我地就兩邊都食一舊睇下,結果我碗飯其實是老公的,可是我吃不出分別呢!哈哈!

吃完飯,我們再行了驚安之殿堂,買了很多東西,不過有的是幫人買,加加埋埋剛好是10000 yen可以退稅。不過排退稅要排到出門口,又要跟很多內地人韓國人一齊排,咁樣排一排用左好多時間,決定之後幾日都不再來驚安了!感覺自己和強國人來港爆買無乜差別……

今日真係行到十二點打後先返酒店,由驚安行返去酒店又是長征,好累,見到很多剛聚會離開的日本人,有的飲醉都有少少驚。下次唔係無酒店都係住返近道頓堀較好。返到酒店立即用下部按摩機,但用完一次覺得無料到……其實累到想訓,但結果無意中在日本看了「在下坂本,有何貴幹?」第一集的動畫,無字幕都睇到識笑,決定要返香港揾來看。

DAY 3 . 京都駅 > 伏見稻荷大社 > 衹園 > 寺町通 > 藤家旅館

2016.04.08 | 旅行遊記: :二零一六.春: :日本 Leave a Comment

這天不知是否太緊張,凌晨五點半就醒左訓唔返,於是索性早起。原定婚照拍攝改了期,時間也由早上變下午,所以去伏見稻荷大社就變成早上去。

法華俱樂部沒包早餐,今日就試了係京都站行遠少少一間麵包店食早餐。吃完就搭JR去伏見稻荷大社。

由於早了起床,到達伏見稻荷大社才不過早上八點!但想不到已有不少遊人來到,但作為熱門景點,這種人數還是可以接受。在入口看到有新人著了婚紗準備入內拍攝,但就比保安阻止,原來這裡已不能穿婚紗拍照了!(不過我估你揹著婚紗上到好高先換衫影相應該都無問題)

原本諗住揾埋toilet先正式上去山,怎料地下的toilet維修中,所以就唯有上山先揾toilet。

伏見稻荷大社的影相位莫過於一上山有兩行鳥居的地方,13年來的時候都好地地,今次再來卻發現在入口有大大塊banner寫住要靠左行……完全破壞了風景。搞到我地set左腳架自拍都要影到那大大塊banner…而且這裡真的好多人山山入入,要影唔到人簡直是沒可能,唯有靠後製。

上一次來因為下午要趕去奈良,結果上到一半就折返,而今次有嘗試行高一點,也在較高地方再set腳架自拍,但想不到今次上到較高地方都有好多人行,可能大家都是晨早晨運吧!但去到分叉路我沒看清地圖就選了有風景的路去行,結果就miss左再上到山頂的路而行了落山路。但事後覺得再上都係差不多風景,如果再有機會或者會上到頂吧!不過今次總算叫繞了一個圈落山,而沒有原路折返。落山路沒有鳥居,反有一些墓園,又有櫻花漂落,感覺清靜優美。

返到落山,發現人山人海,慶幸自己一早來這裡,之後在山下的小食店試了幾款小食,有好食有不好食,試過就算。之後就搭JR返回京都站。

中午就去了拉麵小路吃午飯,選了舊年吃的四國拉麵。由於個肚又有少少唔舒服,所以只叫了small size。老公覺得味道都ok,但就有少少油膩。吃完午飯,出來才發現餐廳開始人多,要排隊先有得食,又一次覺得好彩早去食。

之後又去地鐵站買左一張一日地鐵乘車pass,搭了去烏丸御池站,再行去Studio Zero,其實Studio公司有介紹叫搭到去二条城站再行去,但之後覺得烏丸御池站行過去較直接,即使要行多幾分鐘都覺得OK,所以就早一個站出閘。行去Studio的路好舒服,不是旅遊區關係人很少,但明明有劃分單車路跟行人路,那裡的日本人踩單車都不按指示踩的……

基本上我們的比預定時間早了半小時到,關於拍攝詳情請看我另一篇關於和服婚照拍攝的blog。

當日拍攝完以後,真係成個人鬆晒,而且拍攝實在好快樂,第一次同日本人用英文溝通了很久,總之是一次很愉快的回憶。而且,回港之後開始看不上色打掛以外的和服……另外有人讚我選的和服漂亮就會飄飄然,好似覺得做的選擇比自己結婚選的服裝還明智!

返回烏丸御池站,就不浪費張pass搭一個站去京都市役所前站落,然後今次終於明正言順行寺町通!明明來到京都這些古色古香的地方,我們逛的卻是咭店。因為第一天發現一蘭對面有咭店,所以過來要行返呢間鋪頭。另外也發現同一條街有貓cafe,猶疑要不要入去,但日本的貓cafe都是計時,只包飲品一杯限時60分鐘都有少少貴,最後都係不入去爭取時間逛街。

之後還逛了京都Animate,有揾到小櫻的熊公仔,但因為沒有小狼熊所以無買到。又行了300 yen店,買了家品。還有行行下老公才發現錦市場同寺町通原來那麼近,另外叫入左天滿宮一看,其實都無咩睇。最後又再買了一次動物冬甩吃。

由於是晚要搬去民宿旅館,那裡有門禁時間,所以都不能太夜先去check in,求其找了Mos Burger晚飯,就慢慢行了去四条站搭地鐵返京都站。返到京都站,去法華俱樂部拎返行李就拖過去藤家旅館,這間旅館是我姐臨時幫我book的,因為之前只諗住住兩晚京都,但之後加插了和服婚照拍攝就覺得可以再住一晚京都,而姐就找到這間旅館評價極高,價錢又比華法平,最重要是那裡有一隻女將貓Lily守店!看在貓的份上就叫我姐立即book了!(而且也只有這晚有空房一間)

藤家旅館跟法華只隔了一條街,地點在一條充滿著各種日式旅館的小街內,一入到去就看到很多人準備出門。我們應該是最遲check in的團體,所以女主人可以立即問出我們的booking(當然用英文,她的英文跟攝影的化妝小姐一樣,是可以聽得明的正常語)。之後她就帶我們上房,要自己搬行李上二樓,但我的行李則由男主人幫我搬上去。那裡的房間都用京都的地方名命名,而我們的房間則叫「平安」。進到房內,他們取了膠墊比我們放行李上去免得榻榻米受損。房間看上去非常地道和式,好似有六疊半,交了房錢,女主人就交低key及交帶要鋪床要call她們搞(房門的保安看上去不太安全,不過住旅館都係講過信字,其實整間旅館只有六間房,感覺都安全。另外當晚看上去都好像是台灣人!)。為了爭取最後一天在京都逛街,放下行李就立即再外出,跟女主人交帶了只出去行一會(十一點就門禁啦!澡涼時間也只去到十一點!喜歡夜街的不建議住) 其實住了幾天在京都站都無點行過,不過當晚出去主要是想行yodobashi!出去時看到Lily正在門口巡視,好開心立即上前同佢影下相!女主人也會哄哄她望鏡頭,不過未到門禁時間都會有條超級長繩縛住Lily。我地也係門口拍了幾張,Lily在門口休息也一併被拍下。

之後趕緊去yodobashi逛街,第一目標是先去買電話殼,老公最終有找到岩他電話款的電話殼。然後就上了玩具那層,有看到老公心儀的dyson吸塵機,不過他覺得日本買都係貴。之後有找到貓咪收集的東西買,硬要買左隻!在玩具層邊行邊睇住時間,打算行到九點左右就要返去,因為要排隊沖涼(旅館沒有私人浴室洗手間,全部都係旅客share用) 最尾臨走去埋玩扭蛋,扭了兩隻貓咪收集公仔,老公則扭了一個幾何形狀的東西?(他在八幡市站的一部扭蛋機看中了,這裡有得扭好興奮) 扭完蛋就返旅館。

返到去發現床已鋪好,還沒影過房間未鋪床的內部呢……唯有download官網圖片跟大家講解吧!之後就等女主人入來通知幾時可用浴室,而此時我就到出面走廊的洗手盤落妝,由於我的卸妝水已爆左,雖然在錦市場買左支新的,但因為好大樽不太想用,幸好藤家旅館設備齊全,雖然洗手盤要share用,但甚麼都有,包括卸妝油!實在太好了!因為我拍完和服婚照個妝仲未落,還有好多髮夾要脫,又要老公幫下手,哈哈!

在房坐了一會,女主人就call我們可以去洗澡,然後我就拎衫落下層洗澡,但落到去女主人告知我可以同老公一齊沖,所以又返上房叫埋佢一齊下來,原來澡室有兩個花灑,所以可以一齊沖!跟住缸江有一缸已滿的熱水比我們浸!同日本家庭做法一樣,是共用的!沖完就會到下手繼續用!非常地道及日本家庭式體驗,超正呀!沖完涼返到房hea了很久,拆了扭蛋,吃了旅館送的平安饅頭(原本想留待做早餐,但因為老公好似整濕左所以立即吃了,味道都不錯!)之後還在旅館周圍影下相,有一刻看到Lily在我們的房中門口經過,可惜牠最後都無入來,好傷心!回港看到有些遊記,Lily有入房內叫醒旅客的!始終今天都好早起身,又影相又逛街勞累了一整天,所以無咩做都係早點睡覺好了。

DAY 2 . 京都駅 > 嵐山 > 錦市場 > 二条城

2016.04.07 | 旅行遊記: :二零一六.春: :日本 Leave a Comment

日天天文台真的預測很準,明明昨天還藍天白雲,陽光普照,第二日就落狗屎,真的要用狗屎來形容這天的天氣,真係落足一日!原定安排了今天拍攝已改了到第三天先拍,而今天唯有把都叫有去過的嵐山安排落去。

由於酒店不包早餐,早餐就去了京都站的Mr. Dount食,記得舊年食早餐好凍……接著我們就搭JR去嵐山,由於舊年已試過搭嵐山小火車,一點浪漫感都無,今次就不安排跟老公去搭,反正他主要只係想去睇竹林。不過由嵐山站下車之後都有到小火車個站望下,即使落雨仍然要賣企位,哈哈!望完就開始慢慢行去竹林,由於落雨天氣比想像中凍,而我沒穿太多真的感到有點頂唔順,但當刻只想到要撐下去。

到達竹林,即使落雨,仍然是勁人多。但真係雨好大,老公都無開大機影相。最後影左一陣就走了,返回嵐山,入了一些商店看看加避避雨,買了一些紀念品。之後繼續堅持到了嵐山公園的中之島公園看櫻花,但行到去其實都係揾地方避雨多過賞櫻。避兩的地方遇上幾位台灣人曾跟我們搭訕,但講左兩句就完結了對話。後來等得不耐煩,就跟老公講再出去行一會就回程。

原本想找一間薯餅店又找不著,跟住想由大路行返去火車站,但行行下又覺得好遠,路又找不著,最後想沿路折返,返回竹林入口看到巴士站就決定去搭巴士。不過因為太凍又大雨,心情不太好,想先回酒店換厚一點的衣服先再出動。等車期間老公索性買對面竹林入口的薯餅來吃。

其實我不太想搭巴士,因為舊年搭過真係太慢!結果真係坐左差不多成粒鐘先返到京都站,而且巴士好焗,訓醒都仲未到……返到酒店已兩點幾,成身濕晒都只能著多件衫再出發,因為還未吃午飯,還是想按原定計劃去食蟹道樂。

接著再買了張地鐵一日乘車券搭去京都市役所前站揾蟹道樂食。怎料去到時居然說已預約滿座無得食……有無搞錯,竟然人多到咁?

最後再花了一點時間在寺町通求其揾食,吃了普通日式食品。接著又立即趕搭地鐵去二条城。怎料二条城四點已不再准入場……變成摸門釘(明明五點先關門) 今次真係黑面,因為plan好的行程完全打亂了!然後又好傻仔咁搭返地鐵返去錦市場逛街。趕及關門前掃下街(吃了海鮮飲下橙汁等),再入去商店買下食品補返空虛的心靈。

而二条城在四月櫻花季節會在晚間開放給遊人賞夜櫻,所以一到六點,我地又搭地鐵返去二条城賞夜櫻。

基於昨天在衹園看過夜櫻覺得麻麻,對睇夜櫻沒什麼期待。但入到去發現二条城的夜櫻真的不錯!首先進場牆上會有投射著櫻花圖案迎賓,之後還有燈光隧道,影相效果都ok。不過因為還下著雨撐傘影出來始終差點。

到達花園部份,射燈製造的夜櫻比起衹園靚好多,而且時間尚早遊人不算好多,也見到一些跟我們一樣早場摸門釘的人在晚上入場。不過想進入城內參觀就不能了……我們其實只在城外的花園看花……城池看到兩隻鴨,証實了鴨是可以飛的!繞完一圈,到了最後水池的部份,那些燈還會變色同閃閃下,這個就不太懂欣賞。

最後出口附近還有音樂表演,但聽了一下就走了,不算太懂欣賞,小食店跟商店都有開,還看到很貴的金箔雪糕,賣1200yen,比金澤賣的還要貴,不過除了金箔還有其他材料。但已決定回京都站吃中村藤吉甜品所以沒吃金箔雪糕就回程啦!

中村藤吉跟預料一樣要排隊,其實到達去排都八點幾,諗住吃完不夠飽再出來找其他食店(因為原定是吃宵夜罷,但現在變成了晚餐)最後發現我們竟是最後兩pair人入到場內進食!(原來九點就last order啦!)

其實都排左半粒鐘,還有些人提早離開不排,我們先可以入到去食!跟我後一樣幸運的還有排在我們後面的兩名日本女士。上次真的只吃了甜品,今次則叫了個麵加甜品一齊食,個麵都不錯!甜品就叫了春季限定款(結果還是沒吃過原味),而老公則叫了綠茶(我上次已飲過) 還有說明書教你點飲。最後總結覺得這裡值得來吃一次,但如果要花三小時來排就一定不會吃了!

雖然今日頭半部份真係未能按照時間表進行,坐地鐵老公都說我極度黑面!我真係幾氣憤!但到錦市場逛街,賞二条城夜櫻及吃到中村藤吉之後個人就放鬆返。

然後得到教訓係四月係日本都係著多點衫就對了!明天就要搬酒店及拍攝和服婚照啦!